Monday, April 9, 2018

வெள்ளிங்கிரி பயணம்

இயற்கையின் அழகை பெற விடுமுறை சமயங்களில் NP லாரி, பேருந்து, ரயில் (அதிலும் இது மிகவும் ஸ்பெஷல்) , பைக், கார், விமானம் வரை எங்கெங்கோ பயணம் சென்றிருக்கிறேன். நடந்தும் திருப்பதி, சபரிமலை (காலில் அடி பட்டு தையல் பிரித்த ஒரு வாரத்திலேயே), கர்நாடகாவில் ராஜ்குமார் பங்களா அமைத்திருக்கும் மலைப் பகுதி, கரளயம் எனும் பழங்குடி மக்கள் வசிக்கும் பகுதி என அலைந்திருக்கிறேன்.

கடந்த வாரம் வெள்ளிங்கிரி போகலாம் என முடிவெடுத்து மூன்று பேருடன் தொடங்கியது எங்கள் பயணம், அதிலும் என் மாமன் மகன் கிருபா பத்து மாத கர்ப்பிணி போன்றே தொப்பை வைத்திருப்பவன். "நானா? வெள்ளியங்கிரியா? என்ன விளையாடுறியா?" என்றவனை "உடம்புல என்னடா இருக்கு? மனசு பலம் போதும்டா" என வர வைத்தேன். இன்னொருவன் சஞ்சீவ் பக்கத்துக்கு வீட்டு தம்பி. அவன் இதற்கு முன்பு நான்கு முறை ஏறி இருப்பதால் அவனை வரவைத்தேன்.

இரவு ஏழு மணிக்கே மலை ஏற ஆரம்பித்தோம். முதல் மலை முழுவதும் படிகள், சில உடைந்திருக்கின்றன, 1600 படிகள் என வழியில் ஒருவர் தகவல் தந்து உதவினார். முதல் மலையில் உடலில் இருக்கும் மொத்த தண்ணீரும் வெளிவந்து விடுமளவு நன்றாக வியர்க்கும்,  பொறுமையாகவே ஏறினோம், ஒன்றில் நாங்கள் தெளிவாக இருந்தோம், "இந்த மலை எப்போது முடியும் அடுத்த மலை எப்போது ஆரம்பிக்கும்" என்றெல்லாம் கவலைப்படாமல் ஒவ்வொரு படியும் அனுபவித்தே ஏறுவது என்று.
அந்த எண்ணம் இறங்கும் வரை கை கொடுத்தது.

அதற்கு முன் மலை ஏற்றத்தின் போது என்ன தேவை என்பதையும் சொல்லி விடுகிறேன். மாற்று துணி ஒரு செட், ஒரு நல்ல டார்ச், இரண்டு பாக்கெட் ஆரஞ்சு மிட்டாய்கள் (நா வறலாமல் காக்கும்), க்ளுகோஸ் ஒரு பாக்கெட், ஜெர்கின், போர்த்திக்கொள்ள ஒரு போர்வை, இரண்டு லிட்டர் தண்ணீர், சப்பாத்தி அல்லது அதிகம் எண்ணெய் இல்லாத உணவு, உலர் தீனி (திராட்சை போன்று) மலை அடிவாரத்தில் விற்கும் ஊன்றுகோல்.

முதல்மலையின் முடிவில் இருக்கிறது வெள்ளி விநாயகர் கோவில். கல்லும் முள்ளுமாக கிடந்த இந்த மலையை சீராக்கி படிகள் செய்ய உதவியவர் ஒட்டர் என்ற சித்தராம். அங்கே இரு புறமும் கடைகள் இருக்கின்றன, தர்பூசணி பீஸாக தருகிறார்கள், குளிர் பானங்களை விட அவை எடுத்துக்கொள்ளுங்கள், குளிர்பானங்கள் தாகத்தை அதிக படுத்தும்.

அங்கே பதினைந்து நிமிட நேர ஓய்வுக்கு பின் இரண்டாவது மலைக்கு ஏற ஆரம்பித்தோம், மின்சார வசதியில்லாத, சிதிலமடைந்த படிகளின் வழியே நிலவொளியில் மரங்களின் ஊடே காற்றின் தாலாட்டில் நடப்பது சுகம்.

இரண்டாவது மலை கொஞ்சம் படிக்கட்டுகள் கொஞ்சம் வன பாதைகள் என இருக்கிறது, அதன் முடிவில் பாம்பாட்டி சுனை வரும், அங்கே ஒரு சிறிய மூங்கில் வழியாக நீர் பிடித்து கொள்ளலாம், மலை வழியே வரும் அந்த மூலிகை தண்ணீர் நல்ல சுவை கொண்டது, தண்ணீர் தான் உங்களின் உயிர் தோழன், முடிந்த வரை நாக்கை நனைத்து கொள்ள உபயோக படுத்துங்கள், ஒரு மலைக்கு இரண்டு  ஆரஞ்சு மிட்டாயை உபயோகப் படுத்துங்கள்  ஐம்பது ரூபாய்க்கு ஒரு தண்ணீர் லிட்டர் விற்கிறார்கள், மலை ஏற்றத்தில் சுமந்து வருபவர்களுக்கு கூலி கொடுத்து, போலீஸ்காரர்களுக்கு (நாங்கள் கீழே இறங்கி வரும்போது கடமை மிக்க காவல் அலுவலர் கடைக்கு 300 வாங்கி கொண்டிருந்தார்)  லஞ்சம் கொடுத்து கடை வாடகையும் கொடுத்து பிழைப்பு நடத்த வேண்டுமே என கடைக்காரர் ஒருவர் புலம்பினார்.

 பாறைகளுக்கு நடுவில் படிக்கட்டுகள் செதுக்கி பாதை அமைத்திருக்கிறார்கள், வழுக்குப் பாறை என்று பெயர், சிறிது கவனத்துடன் கடக்க வேண்டிய பகுதி, இது போன்ற இடங்களிலே தான் மூன்றாவது காலான மூங்கில் குச்சி அருமையாக செயல்படும். முன்பெல்லாம் கயிறு கட்டி கடந்த இந்த பகுதியை சீராக்கி இப்போது பாதை அமைத்து தந்திருக்கிறார்கள்.

 மூன்றாவது மலை முடிவிலும் நீர் பிடிக்க இடம் உண்டு, அதன் பெயர் கைதட்டி சுனை. அதிலிருந்து குளிர் உங்களை வரவேற்று தழுவிக்கொள்ளும்.
இடையிடையே கடைகள் இருக்கும், மோர் அல்லது தர்பூசணி அல்லது மூலிகை சூப் கிடைக்கிறது, விலை ஒரு மடங்கு அதிகமாக இருக்கும், இருந்தாலும் அங்கெல்லாம் விலையை பற்றி யோசிக்காமல் வாங்குவது புத்திசாலித்தனம். பஜ்ஜி போண்டாவெல்லாம் விற்பார்கள், கீழே சென்று எவ்வளவு வேண்டுமானாலும் சாப்பிடுங்கள் அங்கே வேண்டாம், மலை ஏறுதலின் ஸ்பீட் ப்ரேக்கர்கள் அவை.

அடுத்ததாக வெள்ளை ஜிப்ஸம் மண் நிறைந்த மலையை விபூதிமலை என்று அலைகிறார்கள், திருநீறு போன்றே இருப்பதால் அதை குடைந்து எடுத்து செல்லும் முட்டாள் தனத்தை நீங்களும் செய்ய வேண்டாம், சிவ தரிசம் முடிந்த உடனேயே அங்கேயே விபூதி பொட்டணம் தருவார்கள்.

இங்கெல்லாம் குளிர் காற்றில் தாலாட்டை நன்கு உணர முடியும், வியர்வை வழிய நடக்கும் உடலுக்கு அது தரும் இதம் சுகம்.

காத்தாதி திட்டு எனப்படும் ஐந்தாவது மலை ஏற்ற இறக்கங்கள் கொண்டது. அங்கேயே ஒரு கடை அருகில் கையில் கொண்டு போயிருந்த புளி, தயிர் சாதத்தை முடித்து விட்டு, இரண்டு மணி நேரமாவது தூங்கி விட்டு செல்லலாம் என படுத்துகொண்டோம். ஜெர்கின் போர்வை தாண்டியும் குளிர் ஊடுருவுகிறது, இரண்டு மணி நேர தூக்கத்திற்கு பிறகு பக்கத்துக்கு கடையில் சுக்கு காபி கிடைத்தது, அவ்வளவு குளிரிலும் அத்தனை சூடான காபி வரம். கொதிக்க கொதிக்க ஊதி ஆனந்தமாக அனுபவித்து சாப்பிட்ட அதன் சுவை வாழ்நாள் முழுவதும் மறக்காது.

ஆறாவது மலையை காஞ்சி மாநதி என்றும், ஆண்டி சுனை என்றும் அழைக்கிறார்கள், அதிலிருந்து கீழே இறங்கி போக வேண்டும். நான்கு காலால் இறங்கும் நகைச்சுவை காட்சிகள் எல்லாம் உண்டு.
 நாங்கள் கீழே சென்ற போது நீர் வரத்து குறைவாக இருந்ததால் குளிக்க முடியவில்லை.

அதிலிருந்து ஏழாவது மலை உச்சியில் பரமன் அருகில் நெருக்கும் நேரம் ஆரம்பிக்கிறது. சிறிது தூரம் கடக்கையிலேயே கடவுளைக் காண பக்தர்கள் காத்திருக்கும் கூட்டம் தெரிய ஆரம்பிக்கும். ஏழாவது மலை சற்றே சோதித்தாலும், காணும் இடமெல்லாம் மேகம் உரசும் நிறைவும், இயற்கையின் கண் கொள்ளா பேரழகும் வாரி அணைத்துக்கொள்ளும். சிவன் அருகில் நெருங்க நெருங்க பரவசம் தொற்றிக்கொள்ளும், உச்சியில் வேல்கள் சூழ நடை பாதை அமைத்து வரிசையில் பரமனை காண நிற்க வேண்டியது தான்.

அழுவதெல்லாம் அவமான சின்னமாக நினைக்கும் எனக்கு சிவனை பார்த்த உடனே ஏனோ கண்ணில் நீர் வழிந்து கொண்டே இருந்தது, நிச்சயம் அதில் துக்கமில்லை, பரவசமா, ஆனந்தமா, உச்ச நன்றி உணர்ச்சியா சொல்ல தெரியவில்லை.

சிவனை தரிசித்து விட்டு வந்து அமர்ந்தீர்கள் எனில் அட்டகாசமான சூரிய உதயம் பார்க்கலாம், அதையெல்லாம் எவ்வளவு எழுத்துக்கள் போட்டு எழுதினாலும் நிரப்பவே முடியாது. சோலை சூழ பனிக்காற்று உடல் மீது பரவ, ஆனந்தம் நிரம்பி வழிய, சூரியன் தன் கிரகணத்தை விரிக்கும் நேரம் சொர்க்கம். அந்த அழகின் மயக்கம் தீர மூன்று மணி நேரம் ஆனது.

நீங்கள் ஆத்திகரோ, நாத்திகரோ, இந்துவோ, வேறு மதத்தினரோ அதெல்லாம் ஒரு பொருட்டே இல்லை, உங்கள் உடலையும், மனதையும் வலுப்படுத்த, இயற்கையின் முழு வீச்சை அனுபவிக்க ஏதாவது ஒரு சாதனையை நிகழ்த்தி விட்டதுபோல் பெருமை சொல்ல நிச்சயம் ஒரு முறை வெள்ளியங்கிரி சென்று வாருங்கள்... என் வாழ்நாளில் நான் சென்ற பயணங்களில் மிக சிறப்பான பயணம் என இதைத்தான் கூறுவேன்.

பின் குறிப்பு: எனது மாமன் மகன் கடைசி மலை இறங்கும் பொழுது மிகவுமே சிரமப்பட்டான், மிக மிக மெதுவாக இறங்கினால் போதும் என்றே வந்தோம்... அதிசயம் என்னவெனில் என்னை விட சீக்கிரமாக அவன் இறங்கி விட்டான்.
காலையில் போன் செய்து "என்ன நடந்தாலும் வருடாவருடம் இந்த அற்புதமான பேரழகை தவற விடக்கூடாது, இனி உடல் எடையை குறைத்து விட வேண்டியதுதான்" என தீர்மானமாக சொன்னான்.

சில அறிவுரைகள்:
தயவு செய்து பிளாஸ்டிக் குப்பைகளை, தண்ணீர் பாட்டில்களை போட கடைகளிலேயே ஒரு சாக்கு வைத்திருக்கிறார்கள், அதிலேயே போடுங்கள்.

நடைபாதை நடப்பதற்கு மட்டுமே. மனிதன் என்ற பெயரில் ஒரு சில மிருகங்கள் அதை கழிப்பறையாக உபயோகப் படுத்துகின்றன. அந்த ஆபாச செயலை தயவு செய்து செய்ய வேண்டாம்.

சக மனிதர்களிடம் சண்டை போடும் இடமோ, கெத்துக் காட்டும் இடமோ அதுவல்ல என உணருங்கள்.

 முடிந்தவரை மலை ஏற சிரமப்படும் மனிதர்களுக்கு ஆறுதலாக இருங்கள், என் மாமன் மகன் அதில் சிறப்பு நானே ஏறுறேன் உங்களுக்கு என்ன பாஸ் என குறைந்தது முப்பது பேரிடமாவது சொல்லி உந்துதல் தந்தான்.

-நன்றி

Thursday, April 5, 2018

நகைச்சு வை

"ஈவினிங் எங்காவது போகலாமா? போர் அடிக்குது" கேட்டது மனைவி.

"லலிதா ஜுவெல்லரி போவோம்"

"ரியலி !"

"உனக்கு பிடிச்ச நகையை செலக்ட் பண்ணிக்கோ"

"நிஜமாகவா?"

"அங்கே ஒரு எஸ்டிமேட் வாங்கிப்போம்"

"வெரி குட் !"

"அப்படியே அந்த எஸ்டிமேடை எடுத்துக்கிட்டு கல்யான் ஜுவெல்லர்ஸ், GRT, உமிடியார்ஸ் மற்றும் சரவணா போவோம். கடைசியா எல்லா எஸ்டிமேட்டையும் எடுத்துக்கிட்டு சரவண பவன் போவோம்."

"அப்பறம்..."

"தோசை, சப்பாத்தி, இட்லினு விதவிதமா சாப்பிடுவோம். சாப்பிடும் போதே எஸ்டிமேட்களை வைத்து சீரியஸா டிஸ்கஸ் பண்ணுவோம்."

"ஓகே..."

"வீட்டுக்கு போவோம்"

"அப்புறம்"

"அடுத்த வாரம் ரொம்ப போர் அடிக்கும் இல்லையா... அப்ப திரும்ப லலிதா போவோம். இன்னொரு நகையை செலக்ட் பண்ணி எஸ்டிமேட் வாங்கி அந்த எஸ்டிமேடை எடுத்துக்கிட்டு கல்யான் ஜுவெல்லர்ஸ், GRT, உமிடியார்ஸ் மற்றும் சரவணா போவோம். எல்லா எஸ்டிமேட்டையும் எடுத்துக்கிட்டு சரவண பவன் போவோம். தோசை, சப்பாத்தி இட்லினு சாப்பிடுவோம். சாப்பிடும் போதே எஸ்டிமேட்களை வைத்து சீரியஸா டிஸ்கஸ் பண்ணுவோம் ..."

மனைவியின் முகம் நெருப்பில் போட்ட தங்கம் போல் சிவந்து கொண்டிருந்தது.

பாத்தியா, பாத்தியா... தங்கமா ஜொலிக்குது உன் முகம்... சூப்பரா இருக்கு... உன் அழகே அழகுதான்... இணையே இல்லை, கண்ணாடில போய் பாரேன்....

#Facebook

Wednesday, March 28, 2018

ஹாசனூர் கோடை வாஸ்தலம்

கொங்கு மண்டலத்தை சேர்ந்த நண்பர்கள் ஒருநாள் பொழுதுபோக்கு வேண்டும் எனில் தாராளமாக ஹாசனூரை தேர்ந்தெடுக்கலாம். (குடும்ப குத்து விளக்குகள், பெண்ணிய போராளிகள் மேற்கொண்டு படிக்க வேண்டாம் உங்களுக்கு உபயோகமாக எதுவும் இல்லை, நண்பன் மேல் அக்கறை உள்ள நல்ல பெண்கள் மட்டும் தொடரவும் )

27 மிக குறுகிய கொண்டை ஊசி வளைவுகள் கொண்ட திம்பம் மலை பண்ணாரி வன சோதனை சாவடியிலிலிருந்து ஆரம்பமாகிறது. (லஞ்சமா லாரிக்கு இருநூறு ரூபா வாங்கறாங்க, "சாப்பாட்டுக்கு பதிலா வேறு ஏதாவது சாப்பிடலாமே போலீஸ்கார்"ன்னு கூட திட்டினேன், வேகமா அங்கிருந்த சாவடிக்குள்ள புகுந்துட்டார் ஒரு போலீஸ்)

 மிக கவனமாக மலை ஏறுங்கள், முக்கியமாக டேங்கர் லாரிகள் நிறைய போகும் பாதை அது, நூறு மீட்டர் இடைவெளி விட்டே தொடருங்கள், அவர்கள் கொண்டை ஊசி வளைவுகளில் பின்னால் வந்தே திருப்ப முடிகிறது .

காலையில் நேரத்திலேயே பயணத்தை தொடங்கி விடுவது உத்தமம், ஏனெனில் மான்கள், மயில்கள், முயல்கள், உங்களுக்கு அதிஷ்டம் இருந்தால் கரடி, யானை மற்றும் ஆளை கொல்லும் சிறுத்தை புலிகளைக் கூட காணலாம். நாங்கள் நிறைய மான்களும், மயில்களும், காட்டு பன்றிகளும், ஒரே ஒரு கரடியையும் பார்த்தோம். (கார் பைக் இரண்டும் ஏற்றது)
 திம்பம் மலையில் பாதி தூரம் ஏறும்போதே மெல்லிய குளிர் உங்களை தழுவிக் கொள்ளும்... கொண்டை ஊசி வளைவுகள் முடிந்த பிறகு வனப்பகுதி சோதனை சாவடி அலுவலகம் தாண்டி ஒரு சிறிய கடையில் சுடசுட சிறு பலகாரங்கள் செய்து தருகிறார்கள். நல்ல ருசியும் கூட... (அங்கேயே டச்சர்கள் வாங்கி கொள்க)

தலைக்கு ஐநூறு வீதம் அறை எடுத்து தங்கும் வசதி ஹாசனூர் முழுவதும் நிறைந்து கிடக்கிறது. KAS என்னும் விடுதியில்  நீச்சல் குளம் வெகு சிறப்பு, தேவையான அளவு தண்ணீர் நிரப்பி தருகிறார்கள். அறைகளும் தேறுகிறது.
 சாப்பாடு நன்றாக சமைக்க வரும் எனில் நாட்டு கோழியை வாங்கி காரில் வைத்துக்கொண்டு அங்கு சென்று சமைக்கலாம், சமையலறை, பாத்திரங்கள் எல்லாம் தருகிறார்கள், நாங்கள் அங்கே சென்று சமைத்தோம். இல்லையெனில் அங்கேயே செய்து தர சொல்லியும் சாப்பிடலாம்.


உற்சாக பானம் வாங்க பக்கத்திலேயே டாஸ்மாக் உள்ளது... ஆறு கிலோ மீட்டர் சென்றால் கர்நாடக சரக்கு மளிகை கடைகளிலேயே கிடைக்கிறது (ஹாப் க்கு தாங்கும் என் கஸின் கட்டிங்கிற்கே பாசத்தை கொட்ட ஆரம்பித்தான்) விலை, சுவை, தரம் உத்தரவாதம். இந்த முறை என் தம்பி துபாயில் இருந்தே வாங்கி வந்து விட்டான், இருந்தாலும் நாலு பாக்கெட் வாங்கினோம் (ஆம், அது ஜுஸ் பாக்கெட்களிலும் கிடைக்கிறது)


காலை மூன்று மணியிலிருந்து ஐந்து மணிக்குள் கர்நாடக எல்லை வரை சென்றால் புலி மானை சாப்பிட்டு கொண்டிருக்கும் டிஸ்கவாரி நிகழ்ச்சிகளை   காணலாம் என்றார்கள். (ஏனெனில் அது புலிகள் காப்பகம்) காலை வரை மட்டையாகி விட்டதால் அதை காண இயலவில்லை
ஆக ஒரு நாளை மிக ஜாலியாக நண்பர்களுடன் பொழுது போக்கி வர உகந்த இடம் ஹாசனூர், ஹாசனூர், ஹாசனூர்
-நிறைவு

Tuesday, March 27, 2018

கொச்சி, செராய் பீச்

இரண்டு நாள் பயண திட்டம்.

கடவுளின் சொந்த தேசமான கேரளாவிற்கு அடிக்கடி செல்வதன் முக்கிய காரணம் அது கோவைக்கு அருகில் இருக்கிறது, அதுவுமில்லாமல் நிஜமாகவே இயற்கையை இயற்கையாக வைத்திருக்கிறார்கள்.

 இரண்டு நாளைக்கு முன்பு எதிர்பாராத திட்டமிடுதலில் போர்ட் கொச்சியும் செராயும் செல்ல முடிவெடுத்தோம். நான் பயணங்களில் முக்கியமாக கற்றுக்கொண்ட விஷயம் என்னவெனில் நல்ல சாப்பாடு கிடைத்தால் அது போன ஜென்மத்தில் நான் செய்த புண்ணியம், உணவக விஷயங்களில் கூகுளை நம்பி நிறைய மண்டை காய்ந்திருக்கிறேன், எனவே இரண்டு வேலைக்கான உணவாவது எடுத்து கொண்டு கிளம்புவதே புத்திசாலித்தனமான காரியம்.

  கோவையில் இருந்து சுமார் 200 கிலோ மீட்டர் தூரமுள்ள போர்ட் கொச்சிக்கு சொந்த வண்டியில் செல்வது உத்தமம், விலை குறைவான நல்ல வசதி கொண்ட விடுதிகள் முன்னரே பதிவு செய்து விடுங்கள். உதாரணமாக இந்த பிரேம்ஸ் ஹோம்ஸ்டே வெகு சிறப்பு. AC அறையே 1600 ரூபாய்தான் வருகிறது, 800 ரூபாயில் இருந்தே விலை ஆரம்பிக்கிறது, குடும்பம் எனில் யோசிக்காமல் அறை பதிவு செய்யலாம்.

வரும் வழியில் கடலுக்கு நடுவில் பாலம் அமைத்து பாதை செய்திருப்பார்கள், இரண்டு பக்கமும் நீர் சூழ கப்பல்களை பார்த்தபடி அந்த பாதையை கடப்பது வெகு அழகாக இருக்கும். ரோபோட் போல சிறிய ரக உளவு விமானங்கள் மேலே பறக்கும் வாயை பிளந்தபடி பார்த்தவாறு போகலாம். பகல் பதினோரு மணிக்குள் அங்கே சென்று விடுங்கள்,  அறையில் சிறிது நேரம் ஓய்வெடுத்துவிட்டு மதிய உணவை முடித்துக் கொண்டு, மூன்று கிலோ மீட்டருக்கு உள்ளேயே எல்லா சுற்றுலா தளங்களும் அடங்கி விடுவதால் அவற்றை விசாரித்து ஐந்து மணிக்குள் முடித்துக்கொண்டு, போர்ட் கொச்சி வந்துவிடுங்கள் வழியெங்கும் வெளிநாட்டு ஜோடிகளும், நம்ம ஊர் (கேரளா நாட்டிளம் பெண்கள்) மேல் சட்டையை மட்டும் உடையாய் போட்டுகொண்டு வலம்வரும் அறிய காட்சியை காணலாம்.
  குழந்தைகள் விளையாட கடலுக்கு அருகே ஒரு பார்க் உள்ளது, சுற்றிலும் கைவினை பொருட்கள், உணவு கடைகள், ஓவிய, இசைக் கருவி விற்பனை நிலையங்கள் என வெளிநாட்டு கலாச்சார அழகில் கடைகள் நிறைந்திருக்கும்... வண்ண ஓவியங்கள், அலங்கார பொருட்கள் என கடைகளை அட்டகாசமாக வைத்திருக்கிறார்கள். பொருட்களை அங்கே பார்த்துக் கொள்ளுங்கள், வாங்க வேண்டிய இடம் பற்றி அடுத்தது எழுதுகிறேன்.

கடலில் கால் நனைக்கலாம், குளிக்க அனுமதிப்பதில்லை, ஆதலால் சூரியன் மறையும் வரை நல்ல ஒரு இடத்தை தேர்ந்தெடுத்து கொஞ்சம் கொஞ்சமாக மறையும் சூரியனின் அழகையும், பிரம்மாண்டமான நகரும் கப்பல்களையும் ரசிக்கலாம்.

இரவு உணவிற்கு அங்கிருந்து நான்கு கிலோ மீட்டர் தள்ளி கிருஷ்ணா போன்ற சைவ உணவகங்களும், முஸ்லீம் பீப் பிரியாணி ஹோட்டல்களும் உண்டு, கட்டுப்படியாகிற விலையில் ஓரளவு நல்ல சுவையுடன் கிடைக்கின்றன.
குடிகாரர்கள் ஒன்பது மணிக்கு முன்பே சரக்கு வாங்கி வைத்து விடுங்கள், நமது ஊர் போல ப்ளாக்கில் கிடைக்காது.

 அடுத்தநாள் காலையில் சிரமம் பார்க்காமல் நாலு மணிக்கு எழுந்து முப்பது கிலோ மீட்டர் தூரமுள்ள செராய் பீச்சுக்கு (ஒரு மணிநேரம்) வந்து விடுங்கள், மூன்று, நான்கு மணி நேரம் கடலில் விளையாடலாம். பக்கத்தில் போட்டிங் போக ஒரு மணிநேரத்துக்கு ஆயிரம் என அழைப்பார்கள் அது சிறப்பில்லை, வேண்டாம்.
 காலை உணவை வரும் வழியில் புட்டு, ஆப்பம், கடலை கறி, அல்லது முட்டை கறி கிடைக்கும் சிறிய உணவகங்களில் கூட நம்பி செல்லலாம், அது கேரள நாட்டின் தேசிய உணவு.

அறை காலி செய்யும் நேரத்தை தெரிந்து கொண்டு அதற்க்கு ஒரு மணி நேரம் முன்னதாகவே செராய் பீசிலிருந்து புறப்படுங்கள். காலி செய்த பின், மதிய உணவை வழியில் முடித்துக்கொண்டு (சாப்பாடு வேண்டாம், கொட்டை அரிசி மட்டுமே கிடைக்கும், வேறு ஏதாவது முயற்சி செய்யுங்கள்) எர்ணாகுளம் வந்து விடுங்கள்.

அங்கே மார்க்கெட் ஜெட்டி உண்டு, அவை முழுக்க லோக்கல் கடைகளால் நிரம்பி வழிந்திருக்கும், பேரம் பேசி வாங்கலாம். அதை முடித்து விட்டு அதன் எதிரிலேயே Boating point Marine drive உண்டு, தலைக்கு நூறு ரூபாய் டிக்கெட் குழந்தைகளுக்கு இலவசம், ஒரு மணிநேரம் கடலுக்குள் சுற்றி காட்டுவார்கள், தனி தீவுகள், கடலோரம் அமைந்திருக்கும் மிகப் பெரிய அப்பார்ட்மெண்ட்கள் என கண்டு மகிழலாம்.
 முடித்த பின் கொச்சியில் உள்ள இந்தியாவிலேயே பெரிய ஷாப்பிங்  மாலான லூலுவை பார்க்கலாம். கிட்டத்தட்ட மூன்று மணி நேரம் சுற்றியும் முழுவதும் பார்த்து முடிக்க இயலவில்லை.
இரண்டு நாட்களுக்கான கேரள சுற்றுலா திட்டம் இத்துடன் நிறைவடைகிறது.



Tuesday, March 20, 2018

ஊழல் - உளவு - அரசியல்


அதிகாரவர்க்கத்துடன் ஒரு சாமானியனின் போராட்டம்.
கதையை மிஞ்சும் நிஜம். கற்பனைக்கும் எட்டாத சாகசம். உயிரோட்டமுள்ள ஓர் அசாதாரணமான ஆவணம்.
(அட்டைப்பக்கத்தில் எழுதப்பட்டிருந்த வாசகங்கள்) 

ஒவ்வொரு வாசகனையும் அது எந்தளவுக்கு புரட்டிப்போடப்போகின்றது என்பதற்கான எச்சரிக்கைக்காகவே அவை எழுதப்பட்டிருக்கக்கூடும். 

வணிகம் சார்ந்து என்னத்தையாவது எழுதிவிடவேண்டும் என அல்லாமல் எந்தவொரு அலங்காரப் புனைவுகளுமின்றி முழுக்க முழுக்க அதன் இயல்பிலேயே ஒன்றி உயிரோடும் வார்த்தைகளைக் கோர்த்து உருவாக்கப்பட்டிருக்கின்றது இந்நூல். சாமானியன் ஒருவனாய் இருந்து ஊழலால் கரைப்படிந்திருக்கும் அரசு இயந்திரத்தை அசைத்துப் பார்க்க துணிந்தபோது தன்னை அடிபணியவைக்க எடுக்கப்பட்ட சித்திரவதைகளிலிருந்து சூழ்ச்சிகளிலிருந்து தப்பிக்க தானெடுத்த முயற்சிகளில் எவ்வாறு இறுதியில் வெற்றி அடைந்தார் என்பதைப்பற்றி பேசுகின்ற ஓர் உண்மைக்கதை. வஞ்சனையால் புதைக்கப்பட இருந்த அரும்பெரும் தன் வரலாற்றை தனியொருவனாகவே நின்று சுயமாக போராடி மீட்டுருவாக்கி வென்று காட்டிய‌ வகையில் இந்த படைப்பு நமக்கு கிடைத்திருக்கிற ஒரு அரிய பொக்கிசம்.

ஒரே இரவில் இந்நூலைப் படித்துமுடித்தேன். அந்தளவிற்கு எழுத்தாளர் இந்தப்புத்தகத்தில் தன் எழுத்துக்களால் வாசகனோடு உரையாடுகின்றார். பேசுகின்றார். உற்சாகமூட்டுகின்றார். சிரிக்கவைக்கின்றார். அழுகின்றார். அழவைக்கின்றார். எங்கெங்கோ அவர்கடந்த பாதைகளில் வாசகனின் கைப்பிடித்து கூட்டிச்செல்கின்றார். பயணிக்கவைக்கின்றார். கற்பிக்கின்றார். சிந்திக்க வைக்கின்றார். உறவாடுகின்றார். இப்படியாக வாசகனின் அசைவுகளைக் கட்டிப் போடுகின்றார். எந்த இடத்திலும் சலிப்பு தட்டவேயில்லை. அவரைப்போலவே சுறுசுறுப்பாகவும் விறுவிறுப்பாகவும் அவரது எழுத்துகளும் நம்மைப்பயணிக்க வைக்கின்றன. 

சாதாரணக்குடும்பத்தில் பிறந்த சங்கர், தனது தந்தை அவரது அரசுப்பணிக்காலத்திலேயே திடீர் மறைவடைந்ததால் அதன்வழி கிடைத்த அரசுப்பணியில், தன் பள்ளிப்படிப்பை முடித்தக்கையோடு தனது பதினாறு வயதிலேயே சேர்கிறார். ஆழ்ந்த சிந்தனையும், தொடர்ந்த வாசிப்பும், அயராத உழைப்பும் கொண்டிருந்தமையால் நாளும் சிறப்படைந்து வருகின்றார். ஆரம்பத்தில் பெரியாரியம், அதைத்தொடர்ந்து இடதுசாரிய கொள்கைகளால் ஈர்க்கப்படுகின்றார். 

கலைஞர் கருணாநிதியின் அரசியல், ஆட்சி நிர்வாகம், மக்கள் நலப்பணிகள் பலசெய்திட்ட திமுகவின் பொற்காலம் தொடங்கி அலைக்கற்றை ஊழல் நடந்த திமுகவின் கெட்ட காலம் வரையிலும் பிறகு ஜெயலலிதாவின் அரசியல் பிரவேசம் தொடங்கி முதல்வரான பின் அவராடிய ஆட்டங்கள், ஊழல்கள், கீழான அரசியல் ஆட்சி நிர்வாகம் தொடங்கி திமுக காலத்தில் தம்மீதும் தம்மைச்சார்ந்தோர் மீதும் போடப்பட்ட பல்வேறு ஊழல் சார்ந்த வழக்குகளை மூட அவர் காட்டிய ஆர்வம், லஞ்ச ஒழிப்புத்துறையில் இல்லாத நடைமுறையில் ஊழல் பின்னணி கொண்ட தமக்கு வேண்டியவர்களை நிர்வாகிகளாக அமைத்து தமக்கு வேண்டியதை செய்துக்கொள்ளும் அடாவடியான ஆளுமை வரையிலும் நடந்தவற்றை உள்ளதை உள்ளபடி பட்டியலிடுகின்றார். இதுவரை நான் எனதளவில் கொண்டிருந்த ஜெயலலிதா எனும் ஆளுமையின் பிம்பம் சுக்குநூறாய் போனது. 

அடுத்ததாக அண்ணாபல்கலைக்கழகத்தில் பொறியியல் படிப்பில் சேர்வதற்கு முதல்வர் ஒதுக்கீட்டு முறையில் ஒதுக்கப்பட்ட இடங்களைவிட அநேக இடங்களில் அமைச்சர்கள் சிபாரிசோடு அரசு உயர்நிலை அதிகாரிகளின் பிள்ளைகள் உட்பட மதிப்பெண்கள் குறைவாக எடுத்திருந்தவர்களுக்கு இடங்களை ஒதுக்கப்பட்டிருந்தது. பலகாலமாக இதுபோன்ற அராஜகங்கள் நடந்துவந்தாலும் அரசு ஊழியர்கள் தானுண்டு தன்வேலையுண்டு என்று இருக்கும் ஒரே காரணத்தினால் தான் இதுபோன்ற ஊழல்கள் நடக்கின்றன என்று வருத்தப்படுவதோடு எப்படி இருக்க வேண்டும் என்பதற்கு உதாரணமாய் தன்னையே களத்தில் இறக்கி செயல்படுகின்றார். அதன் பயனாய் பல முயற்சிகளுக்குப் பிறகு இறுதியில் உச்சநீதிமன்றம் அத்தகைய ஒதுக்கீட்டு முறையை நீக்குகின்றது. இது பெரிய சாதனை அல்லவா. இதுபோன்று பல இடங்களில் தன் கண்ணுக்கு முன்னால் நடக்கின்ற அநீதிகளை தன் பலத்திற்கு உட்பட்டோ மீறியோ காரியத்தில் இறங்கி சாதித்திருக்கிறார். 

கிட்டத்தட்ட பதினேழு ஆண்டுகளுக்கும் மேலாக அரசுப்பணியில் வேலையில் இருந்த சங்கருக்கு தன் தலையெழுத்தையே மாற்றப்போகும் அளவிற்கான சிக்கல் உண்டாகின்றது. தொலைப்பேசி ஒட்டுக்கேட்பு வழக்கில் சந்தேகத்தின் பேரில் விசாரிக்கப்பட்டு கைது செய்யப்பட்டு சிறைக்குச் செல்கின்றார். சிறைத்துறையிலும் நீதித்துறையிலும் நடந்த (நடக்கின்ற) அநீதிகளைச் சொல்லிச் செல்கின்றார். 

சிறைவாசத்தில் பெற்ற அனுபவத்தை நிறையவே பகிர்ந்திருக்கின்றார். பீடிக்கட்டுகள்தான் சிறைக்குள் பணமாகி இருப்பதைப்பற்றியும் விவரிக்கின்றார். சிறை நிர்வாகத்தில் நடக்கும் ஊழலைப்பற்றியும் அரசியலைப்பற்றியும் சொல்கின்றார். பணவசதி இல்லாதவர்கள் ஜாமீனில் வெளிவரமுடியாமல் இருக்கும் ஏனையோர்கள், தங்கள் குற்றத்திற்கு தண்டனைக் கிடைத்தாலும் கிடைக்கக்கூடிய காலத்திற்கும் அதிகமாய் விசாரணை என்ற போர்வையில் விசாரணை நீட்டிக்கப்பட்டு அநியாயமாய் சிறையில் தண்டிக்கப்படுவதை அடிக்கோடிட்டு காண்பிக்கின்றார். பின்னாளில் ஜாமீனில் வெளிவந்தபிறகு சிறையில் சந்தித்த இசுலாமிய நண்பர் ஒருவருக்கு வழக்கிலிருந்து வெளிவர அவரது உண்மைத்தன்மையை ஆராய்ந்து வைத்து, தன்னால் முடிந்தவரை உதவிசெய்ய முயன்று, செயலை முடுக்கிவிட்டு அதில் வெற்றியும் அடைகின்றார். 

நீதித்துறையில் வெளிப்படையாக பார்க்கும் பொழுது எல்லாம் சரியான முறையில் நடப்பது போன்று தோன்றுவது மாயை என்றதோடு அங்கு உள்ளே நடக்கின்ற அவலங்களை தோலுரிக்கின்றார். அரசியல் காரணமாக ஒரு வழக்கை எத்தனை நீதிபதிகள் விசாரிக்கின்றனர் என்பதும், ஒரு வழக்கின் விசாரணை முடிந்து தீர்ப்பு வழங்கவிருக்கும் வேளையில் நீதிபதி மாற்றப்படும் மோசடி நடப்பதையும் ஒவ்வொன்றாக வரிசைப்படுத்திச் சொல்கின்றார்.

ஒருமுறை நீதிமன்ற அறையைவிட்டு வெளிவரும் பொழுது தன்மேல் கொண்ட ஆத்திரம் மற்றும் விரக்தியால் பொய் புனைவுகளோடு குற்றம்சாட்டிய அதே டிஎஸ்பி பாலு நிற்கின்றார். அப்போது சங்கர் அவரருகில் சென்று 'என்ன பாலு, எப்படி இருக்க?' என்று கேட்கும்பொழுது அட்டகாசம். (ஒரு பி.ஜி.எம் பின்னால ஓட விட்டுருந்தமாதிரி இருந்துச்சு.)

கிட்டத்தட்ட ஒன்பது ஆண்டுகளாக இவரது வழக்கும் நடக்கின்றது. தர்மத்தின் வாழ்வுதனை சூது கவ்வும், மீண்டும் தர்மமே வெல்லும் என்னும் முதுமொழிக்கேற்ப, ஆரம்ப காலத்தில் அதிகாரிகளால் இவர்மீது பொய்யாக சோடிக்கப்பட்ட குற்றச்சாட்டுக்கள் அடங்கிய குற்றப்பத்திரிக்கையின் மீது இறுதிக்கட்ட குறுக்குவிசாரணையில் சில சாட்சியங்கள் இறந்தும் பல சாட்சியங்கள் முன்பு பொய் சொல்லிவிட்டு பின்னர் பிறழ் சாட்சியங்களாய் மாறின. பல போராட்டங்களின் விடியலாய் ஓர்நாள், சாட்டப்பட்ட அத்தனை குற்றச்சாட்டுக்களிலும் இருந்து சங்கர் விடுவிக்கப்பட்டு விடுதலை செய்யப்படுகின்றார். 

சங்கர் அவர்களின் வாழ்வில் பல இடங்களில் முக்கிய திருப்புமுனையாக அமைந்து, அவருக்கு பலவழிகளில் உதவி செய்திட்ட மனிதர்களை பட்டியலிட விரும்புகின்றேன். பேராசிரியர் கல்யாணி, எஸ்.பி. அருண், நண்பர் ராஜசேகர், முக்கியமாக லஞ்ச ஒழிப்புத்துறை அதிகாரி உபத்யாய், வழக்கறிஞர் புகழேந்தி, டெகல்கா சார்பில் வாதிட்ட வழக்கறிஞர் மணிகண்டன், மற்ரும் இறுதி குறுக்கு விசாரணையின் வழக்கறிஞர் ரமேஷ் ஆகியோர்களை போற்றுகின்றேன். 

இப்படியாக ஒவ்வொருவரும் ஒரு துரும்பை எடுத்துப் போட்டதால்தான் தம்மால் முதலைகள் நிறைந்த ஒரு குளத்தில் நீந்திக் கரையேற முடிந்திருக்கிறது என்று சொல்லுவதோடு, இதுவரை பட்டதற்கு வருத்தப்படவில்லை மாறாக பெருமைப்படுவதாகவும் எழுத்தாளர் சொல்லி முடிக்கின்றார். 

சங்கர் அண்ணனுக்கு என் வாழ்த்துகளும் நன்றிகளும். 

இதுபோன்று நிறைய சங்கர்கள் மறைந்து வாழ்ந்தும் வரலாம். பிரச்சினைகளில் சிக்குண்டும் இருக்கலாம். சமூகத்திற்கு உதவ நினைத்து தன் நலன்களை இழந்தும் நிற்கலாம். தயவு செய்து உங்கள் கண்முன்னால் அப்படி யாரேனும் இருந்தால் தோள் கொடுத்து அவர்களை நிமிரச்செய்யுங்கள். அவர்கள் தண்டிக்கப்படுவதற்கு வடிகாலாய் மட்டும் அமைந்துவிடாதீர்கள். நீங்களும் அரசு வேலைப்பார்ப்பவராய் இருந்தால் மறைமுகமாகவாவது உங்களால் முடிந்த அளவிற்கு வேண்டிய உதவியை செய்ய முன்வாருங்கள். நமக்கு சங்கங்களை விட இப்போது நிறைய சங்கர்கள் தான் அவசியமும் தேவையும் கூட. 

இதுவே சவுக்கு சங்கர் நம்மிடம் இருந்து எதிர்பார்ப்பார் என்பது எனது அனுமானம். 

நன்றி
அங்குராசன். (https://www.goodreads.com)
23-02-2017

Tuesday, February 27, 2018

விமானங்கள் எப்படி காணாமல் போகின்றன

எந்த ஒரு விமானமாக இருந்தாலும் அதற்கு அலைவரிசை (frequency) இருக்கும். ராடார் அதை கண்காணிக்கும். அந்த ராடாரிலிருந்து பாதை மாறிப் போவதைத்தான்  விமானம் தொலைந்து விட்டது என அறிவிக்கிறார்கள்.
 பொதுவாக ராடாரிலிருந்து விலகுவதற்கு விமானியின் கவனக்குறைவு, கட்டுப்பாட்டு அறையில் இருப்பவர்களின் தவறுகள், விமான கோளாறு, அதி வேகமாக மாறும் தட்ப வெப்பம் என பல காரணங்கள் உள்ளன. 

பெரும்பாலான விமான பாதைகள் கடல் வழியே மேலே போவது போன்றே அமைக்கப்பட்டிருக்கும்.

 மலேசியா போன்ற விமானங்களை ஏன் இன்னும் கண்டுபிடிக்க முடியவில்லை என்றால், விமான கோளாறு ஏற்பட்டு தரையில் விழுந்தால் அதை கண்டுபிடிப்பது எளிது, ஆனால் அதுவே கடலில் விழுகையில் 400 கிமீ வேகத்தில் சென்று கடலுக்குள் பாய்கிறது... 

2 கிமீட்டருக்கு மேல் ஆழத்தில் சென்று விழுகிறது. மிக சக்தி வாய்ந்த நீர்மூழ்கி கப்பல் கூட ஒரு கிலோ மீட்டர் ஆழத்திற்கு மேல் செல்ல இயலாது. இதனால் தான் தொலைந்து போன விமானங்களின் பாகங்களை கூட  கண்டுபிடிக்க இயலவில்லை.

இதை தாண்டி இந்த பெர்முடா முக்கோணத்தில் காணாமல் போன விமானங்கள் எல்லாம் துருவி துருவி காரணம் கண்டுபிடித்துவிடும் அறிவியலுக்கே   பெருங்குழப்பம்

Friday, February 23, 2018

ஹரிசுதன்

''இது ரொம்ப ஹிஸ்டாரிக்கல் கோயில். சாமி கும்பிடுமா, கடவுள் நம்பிக்கை உண்டோ?' என்றார் கூடவந்த இன்னொரு தோழர் ஹரிசுதன்.
''நம்பிக்கை உண்டு... மூடநம்பிக்கை இல்லை'' என்றேன்.
''என்னண்ணே திடீர்னு கமல் மாதிரி பேசுறீங்க'' என கமென்ட் போட்டான் அலெக்ஸ்.
''கடவுளே மூடநம்பிக்கைதானே குட்டா...'' எனச் சிரித்த தோழர் ஹரிசுதனை உங்களுக்கு அறிமுகப்படுத்த வேண்டும்.
வேளாண் வளர்ச்சிக்காகவும் இயற்கை வளங்களின் சுரண்டல்களுக்கு எதிராகவும் நடக்கும் அத்தனை போராட்டங்களிலும் தன்னை இணைத்துக்கொள்பவர் ஹரிசுதன். ஒடிஸா மலைக் கிராமங்களை வேதாந்தா நிறுவனம் ஆக்கிரமித்த பிரச்னையில் இருந்து, காவிரி டெல்டாவை விழுங்கும் மீத்தேன் திட்டம் வரை இந்தியா முழுவதும் பயணப்பட்டு போராட்டங்களில் பங்களிப்பவர். ஆறு மாதங்களுக்கு மேலாக சட்டீஸ்கர், ஜார்கண்ட், மேற்குவங்கக் காடுகளில் அலைந்து, அந்த மக்களோடு வாழ்ந்து, அவர்களின் வாழ்நிலையை ஆவணப்படுத்தியவர்.
''மார்க்ஸையும் மசானா ஃபுகோவையும் படிச்சிக் கிழிச்சு வளர்ந்தோமே குட்டா... அதான் மிஸ்டேக். மத்த ஆளுக மாதிரி வேடிக்கை பார்த்துட்டு வீட்டுக்குப் போய் மேட்ச் பார்க்க முடியல. தூக்கம் பிடிக்கல. ஊர் ஊராப் போய் தொண்டை கிழியக் கத்துறோம்... கொடி பிடிக்கிறோம். இதோ பாருங்க... லெஃப்ட் ஷோல்டர்ல, முதுகெல்லாம் பார்த்தீங்களா..! இதே ஊர்லதான்... தாலுக்கா ஆபீஸ் முன்னாடி பைக்ல வந்தவனை இழுத்துப்போட்டு வெட்டினாங்க ஒரு அரசியல் கட்சி ஆளுங்க. நாலைஞ்சு வெட்டு... வெறி புடிச்ச மாதிரி ஓடித் தப்பிச்சேன். ஒரு வெட்டு கழுத்துல விழுந்திருந்தாலும் அவுட்டு. நம்மளால இன்னும் சில காரியங்கள் நடக்கணும் இந்த உலகத்துக்கு. அதான் பொழச்சுவந்திருக்கேன்'' எனச் சிரித்தவரைப் பார்க்க ஆச்சர்யமாக இருந்தது. 
'இதுல ரொம்பப் பெரிய துயரம் என்னன்னா குட்டா... நாம யாருக்காகப் போராடுறமோ, அவங்களே நம்மளை காமெடியனாப் பார்த்துட்டுக் கடந்து போறதுதான். இந்தச் சனம் இப்படித்தான். தீயதுக பின்னாடிதான் போவும்; அபத்தங்களைத்தான் கொண்டாடும்; கெட்டவனைத்தான் ஜெயிக்கவைக்கும். அதுக்காக நாமளும் வேஷம் கட்டிட்டு பவருக்கும் ஷோக்குக்கும் அடிமையாக முடியுமா? அதுக்கு, பீயைத் தின்னுப் பொழைக்கலாம்; இந்த பஜார் பக்கம் ஒரு ஹோம் பிடிச்சு பிராத்தல் பண்ணலாம்; ட்ரக்ஸ் வித்து, ஃபோர்ஜரி, கரப்ஷன் பண்ணி காசு சம்பாதிக்கலாம். அதுக்கா நாம வந்தோம் குட்டா? வாள சொழட்டிட்டே இருக்கவேண்டியதுதான்; போராடிட்டே சாக வேண்டியதுதான்... நம்ம சே மாதிரி, உங்க பிரபாகரன் மாதிரி, கம்பீரமா கண்ணைத் தொறந்துவெச்சுட்டே சாவோம். பெரியார் மாதிரி மூத்திரப்பை சுமந்துக்கிட்டே வில்லன்களை அடிச்சு நொறுக்குவோம். ஏ.கே.ஜி இருந்தார்ல. தோத்தா என்ன? ராஜதந்திரம்னு மக்கள் அரசியலை அடகுவைக்காம, செங்கொடியைப் போத்திக்கிட்டுச் செத்துப்போவோமே? புதிய அரசியல் அதிகாரத்துக்கான அரசியலை முன்னெடுக்கணும். அன்னிக்கு எங்க கட்சி ஆபீஸ்லயே ஒருத்தன் 'அட்ஜஸ்ட் பண்ணிட்டுப் போவணுங்கிறான். காலம் மாறிருச்சுங்கிறான்.’ அறத்துக்கு அட்ஜஸ்மென்ட்டே கிடையாதுடா முட்டாள்'' - சட்டென மௌனமாகித் தீவிர யோசனையில் ஆழ்ந்து திரும்புகிறார்.
''முடியல குட்டா... சுயநலமான தனிமனித வளர்ச்சி, பெருமுதலாளிகள் வளர்ச்சி, அதிகாரக் குவியல் எல்லாம் இந்த நாட்டையும் நம்ம இயற்கை வளங்களையும் தின்னுட்டு இருக்கு. இப்பிடியே கோடுபோட்ட மாதிரி இந்தியா முழுக்கப் போனேன். இங்க காசர்கோட்டுல எண்டோசல்ஃபான். தெரியும்ல... இப்பவும் தலை வீங்கி, குச்சிக்குச்சியா புள்ளைக அலையுதுக. உ.பி மெஹ்ந்திகாஞ்ச்ல எட்டு கிராமங்களை மொத்தமா உறிஞ்சு எடுத்துட்டுப் போயிட்டான் கூல்டிரிங்ஸ் கம்பெனிக்காரன். போராட்டம், பேரணினு அங்கேயே கெடந்தோம். மொத்தத்தையும் உறிஞ்சு ட்ரை ஆக்கிட்டு அப்புறம்தான் விட்டுட்டுப் போனானுங்க. இங்க கேரளா பலாச்சிமடாலேருந்து திருச்சி சூரியூர் வரை அதான் நடக்குது. சோன்பத்ரால தெர்மல் பவர் ப்ளான்ட் போட்டு என்ன பண்ணானுங்க? இப்பவும் அங்கே பொறக்குற புள்ளைக கை கால் வளைஞ்சு பொறக்குதுக. வாத நோய், மென்டல் டிஸ்ஸார்டர், பல்லு பூரா கறைனு மனுஷங்க அவ்வளவு கொடுமையா அலையுறாங்க. ஒடிஸா ஜகத்சிங்பூர்ல கொரியாக்காரன் இரும்பு உருக்கு ஆலை வைக்கிறேன்னு இருபத்தோராயிரம் மக்களை வெளியேத்தினான். அதிகாரத்துல இருக்கிற எவன் கேட்டான், எங்க போய் நின்னுச்சுங்க அந்தச் சனம்? போய் பார்த்தா வயிறு எரியுது. இந்தக் காயல்பட்டினத்துல கெமிக்கல் கம்பெனி வெச்சு, ஊர் மொத்தமும் சுவாசப் பிரச்னை வந்திருக்கு. இப்பவும் போராடிட்டுத்தான் இருக்கோம். என்ன தேசம்டா இது? இந்த ஊர்ல ஒரு அரசியல்வாதி, ஒரு பணக்காரன், ஒரு தொழிலதிபர் பாதிக்கப்பட்டிருக்கானா? ஏழைங்க மட்டும் என்ன எலிங்களா? விடக் கூடாது குட்டா. அடிச்சு இவனுங்களைக் காலி பண்ணிரணும்.'' 

நன்றி: ராஜு முருகனின் ஜிப்ஸி